اجمل خټک باباخاورو ته وسپارل شو،دباچا خان دکورنۍ هېڅ غړی نه و ورغلی
08.02.2010 13:35مشر ليکوال،شاعر،اديب،سياستوال او ټولنيز شخصيت ارواښاد اجمل خټک بابا نن له غرمې وروسته په خپله پلرنۍ هديره کې خاورو ته وسپارل شو.
د نوموړي د جنازې مراسم د اکوړه خټک په خوشال خان خټک کالج کې ترسره شول او وروسته بيا په خپله پلرنۍ هديره کې خاورو ته وسپارل شو.
د ارواښاد دجنازې په مراسمو کې په زرګونو تنو قلموالو،دبابا مينه والو،سياسي شخصياتو، په پېښور کې د افغانستان د کونسلګرۍ استازيو او ولسي وګړيو ګډون کړی و،په داسې حال کې چې له سهاره په سیمه کې باران ورېږي خو بيا هم په زرګونو خلکو دبابا وروستي ديدار ته ځان رسولی و.
په پېښور کې دافغانستان دجنرال کونسلګرۍ پلاوي د ظاهر جان بابري په مشرۍ په جنازه کې ګډون وکړ. همداشان له کابله د کريم خبرم په مشرۍ يو لوړپوړی دولتي پلاوی چې وحيدالله سباوون،فراهي،د بهرنيو چارو او نورو ادارو استازي پکې ګډون لري شېبه وړاندې اسلام اباد ته را رسېدلي.
په اسلام اباد کې دافغانستان سرپرست سفير ښاغلي مجنون ګلاب د ټليفون پر ليکه ټول افغان ته وویل چې دالوتکو دمهال وېش له لامله افغان پلاوي ونشوای کړای په ټاکلي وخت د جنازې مراسمو ته ځان ورسوي خو ښايي له ماښام وړاندې د ارواښاد کورته ورشي او بيا يې پر قبر دګلونو ګېډۍ کېږدي.
د خواشینۍ خبره دا وه چې دفخر افغان خان عبدالغفار خان بابا د وارث (اسفنديار ولي خان) په ګډون د هغه د کورنۍ هېڅ غړي نه خو په جنازه کې ګډون کړی و او نه د ارواښاد کورته ورغلي.
د بابا په جنازه کې د اسفنديار ولي خان او دهغه د کورنۍ دغړيو د نه ګډون له لامله د عوامي نېشنل ګوند او خدايي خدمتګار غورځنګ يوشمېر غړيو ډېره نا خوښي ښودلې،په سيمه کې د عوامي نېشنل ګوند څو تنو غړيو په دې اړه ټول افغان ته وويل چې اجمل خټک بابا د فخر افغان له نژدې ملګريو څخه و چې تل يې د باچا خان کورنۍ او بچيان د خپلو بچیانو پشان ګڼلي،دهمدغه مېړني خټک د مبارزې برکت و چې نن ورځ اسفنديار – اسفنديار- دی.
ياده دې وي چې اجمل خټک ښايي د عوامي نېشنل ګوند يواځنی مشر وي چې نه شخصي موټر لري، نه بانکي حسابونه،نه مارکېټونه او نه نوره شتمني،د نوموړي يواځنۍ شتمني دڅلورو مرلو (لږ دپاسه يوه بسوه) کور دی چې له هغه څخه په ميراث کې پاتې شو.
د ليکوال څو نورې لیکنې
- د بغلان د وروستۍ پېښې په اړه د حزب اسلامي افغانستان اعلاميه.
- له محمد ايوب توحيدیار سره د خواخوږۍ پيغامونه
- پاکستاني پوليسو د افغان فرهنګي شخصيت حاجي ايوب توحيديار ورور وواژه
- لارهور : د استخباراتي ادارې دفتر درنې چاودنې له خاورو سره خاورې کړ
- پر فوزيه کوفي وسله وال بريد شوی
- د تحريک طالبان پاکستان د مرستيال مولوي فقير محمد د وژلو ادعا شوې
- دوه نور بهرني سرتېري وژل شوي
- هنګو: ځانمرګي بريد درنه مرګ ژوبله اړولې
- اسلام اباد: په نړیوال اسلامي پوهنتون کې د پښتو ژبې څانګه پرانیستل شوه
- په کراچۍ کې د يوبل طالب مشر دنيول کېدا خبر ورکړل شوی
